مدونتي الجديدة :D

السلام عليكم ورحمة الله وبركاته

أنا لقيت إن مدونتي بقت ملخبطة على بعض ، بقت حاجات شخصية على وجهات نظر على قصص على كلام نفسي أقوله

فبصراحة في بعض المواضيع اللي كنت بحس إنها بتفرق معايا ومع اللي بيقراها

فجمعت كل المواضيع دي وعملت بلوج ، زي ما تقولوا كده كتاب بيضم وجهة نظري في مواضيع مختلفة

المدونة إسمها وجهة نظري

المواضيع اللي فيها كلها متكررة لكن متجمعة مع بعض في مكان واحد

اتمنى إنها تعجبكم وتفيدكم :)

النصيحة وسط الناس فضيحة

السلام عليكم ورحمة الله وبركاته

أوقات كتير بنلاقي واحد جاي ينصح واحد تاني في وسط الناس بأسلوب يسبب إحراج للمنصوح

تخيل لو إنت عملت حاجة غلط وواحد جاي يقولك إنت بتعمل كذا وكذا في وسط الناس

أكيد حاجة تضايق ، ما ينفعش يا جماعة إننا نفضح الناس ونسبب لهم إحراج

بس نصيحة مني ، الشخص المنصوح يتقبل النصيحة بأي شكل

ياخد من الشخص اللي نصحه الحاجة اللي تفيده ويسيب الحاجة اللي ضايقته

ونصيحة للناصح ، إنك تنصح دي مكانة كبيرة أوي خليك أدها وقدر النعمة اللي معاك

كلم اللي عايز تنصحه بود وحب إنت أكيد عايز مصلحته فوصله الرسالة بأسلوب جميل

لأنك أكيد هتحتاج في يوم نصيحة من حد ووقتها هتتمنى إن النصيحة تجيلك بشكل جميل

فعامل الناس كما تحب أن يعاملوك

كل اللي يعجبك وإلبس اللي يعجبك برضه

السلام عليكم ورحمة الله وبركاته

سمعنا كتير عن المثل اللي بيقول "كل اللي يعجبك وإلبس اللي يعجب الناس"
طيب وهل دي حاجة معقولة؟
يعني لبسي اللي يتحكم فيه الناس مش أنا
هو أنا بالبس علشان الناس ولا علشاني
طيب واشمعنى الأكل اللي الناس مش بتدخل فيه؟
لا بجد حاجة غريبة جدا أنا عن نفسي مش بامشي بالمثل ده خالص
لكن المثل بتاعي هو " كل اللي يعجبك وإلبس اللي يعجبك برضه"
أنا شايفة مادام اللي باعمله لا يعارض ديني ولا يضر بحالتي المادية والاجتماعية ولا بشكلي العام ولا يضر أحد فأنا براحتي تماما

وشكرا

جزاكم الله خيرا

السلام عليكم ورحمة الله وبركاته

ازيكم يا شباب؟

جزاكم الله خيرا لكل اللي بيرد وبيشاركني.

بس زي ما انتم عارفين إني عاملة المدونة ده للمشاكل والمواقف اللي بنشوفها في بلدنا

لكن أنا عندي مدونة تانية ، يشرفني إني أشوفكم هناك

enjy-badran.blogspot.com

الشوكة والسكينة

السلام عليكم ورحمة الله وبركاته

أكيد لما بنخرج ونأكل في أي مكان شيك بيجيبلك شوكة وسكينة
وانت تحاول تبان بقى إنك متعود على الشوكة والسكينة وانك من صغرك وانت بتفهم في الذوق والاتيكيت
:D
وتقطع بالراحة وتاكل بالراحة والكلام الجميل ده
المهم كلنا عارفين إن الشوكة بتتمسك بالإيد الشمال والسكينة باليمين
المهم لأن ديننا الجميل بيقولنا اننا ناكل باليمين ففي ناس بعد ما بتقطع اللي هتاكله وهي ماسكة الشوكة في الشمال تروح قبل ما تاكل تغير مكان الشوكة وتجيبها في إيديها اليمين
وده تصرف صح تماما علشان ننفذ اللي رسولنا الكريم وصانا عليه
المهم انا بقى باعمل حاجة تانية خالص و باحس اني مبسوطة اوي لما باعملها

انا لما باقطع الأكل بابقى ماسكة الشوكة في ايدي اليمين و السكينة في الشمال يعني مش زي المتعارف عليه

معرفش ليه باحس اني مبسوطة أوي ... يمكن لأني باكون مختلفة عن كل الناس
:D
أو لأني مقتنعة إقتناع تام بحاجتين أول حاجة
إني أعمل أي حاجة أنا عايزاها مادام الحاجة دي مش حرام ولا بتضر حد
تاني حاجة
إني مش ملزمة إني أنفذ أي حاجة الغرب قالوها
متهيألي حته ان الشوكة تكون في الشمال دي من الغرب

ممكن ناس يتكسفوا انهم يحطوا الشوكة في اليمين والسكينة في الشمال احسن الناس يقولوا عليهم انهم مش بيفهموا في الذوق والإتيكيت
وفي ناس ممكن تتكسف إنها بعد ما تقطع الأكل تبدل مكان الشوكة وتحطها في اليمين علشان الناس مش يتريقوا عليهم

ولكن لو كان عندك ثقة في نفسك وثقة في أنك ممكن تغير عادة انت شايف انها ممكن تكون غلط وقتها تقدر تعمل المعجزات
فأبدأ بنفسك وكن قدوة للمسلمين

على فكرة ان احنا نقطع الاكل واحنا حاطين الشوكة في الشمال والسكينة في اليمين ديه مش حاجة غلط تماما ولكن الغلط اننا ناكل بالشمال

أتمنى إني أكون فيدتكم

أطفالنا

السلام عليكم ورحمة الله وبركاته

وأنا صغيرة كنت اتمنى إني ألاقي وسائل ممتعة أقدر إني أعرف بيها ربنا أكتر وأقدر اتعرف على مبادئ الإسلام الجميلة

ألاقي حضانة ألعب فيها بألعاب مبتكرة ، ألاقي برامج بتحاول توصلي أفكار جميلة بصورة جذابة

كان أقصى حاجة ممكن أشوفها وكنت بابقى مبسوطة بيها جدا ، أغنية لنيللي أو كارتون مافيهوش اي حاجة مفيدة وكان اللي بيجذبني فيه الشخصيات اللي بتتحرك ، وحتى لو فيه حاجات مفيدة ما كانش بيكون بنفس الجودة الموجودة دلوقتي

لكن دلوقتي بقى في حاجات ما شاء الله أفضل بكتير ، يعني عملوا قناة في التليفزيون قناة رائعة اسمها طيور الجنة ، بتعرض أغاني للأطفال جميلة جدا وأطفال هما اللي بيغنوها وبيحطوا فيها معاني جميلة أوي ، وبيجيبوا الأطفال دي وهما بيقرأوا قرآن بصوت رائع علشان يكونوا قدوة للأطفال اللي بيشوفوهم

بقى في حضانات بتبتكر أفكار جميلة أوي للأطفال

بجد حاجة جميلة أوي ان يكون العالم من حواليك حس ان الاطفال دول لو نشأوا نشأة صحيحة المجتمع هيتعدل حاله كتير

... تحيا مواصلات مصر العربية

السلام عليكم ورحمة الله وبركاته

أكيد اي حد لما بينزل يروح مشوار ، يروح شغله ، يروح كليته ، مدرسته ... بيركب مواصلات

ومن غير ما اتكلم كلنا نحمل في صدورنا الكثير والكثير عن كلمة مواصلات
لا ميكروباصات نافعة ولا تكاسي ولا اتوبيسات
وزي ما انتم عارفين أو بلاش عارفين زي ما انتم مجربين البهدلة الجميلة اللي بنتبهدلها كل لما بنفكر نركب ميكروباص
واللي ادهى وأمر سبيلا لما نفكر نركب ميني باص يــــــــــــاه أكيد انتم عارفين اللي بيحصل

وحاسب يا عم وانا اتحشرت يا استاذ ووسع يا سيدي ولا بقى لو انت قاعد على كرسي وقمت علشان تنزل تلاقي ألف واحد واقف عايز يفوز بالكرسي اللي كنت قاعد عليه ولا بقى لو انت نازل وواقف على السلالم ناس كالعادة يــــــــــــــــاه على اللي بيحصل منتهى الإحترام للبني آدم

وده مش بس في الميني باصات ده كمان في الميكروباصات ، من اسبوعين كده شفت منظر بعيني في ميدان الجيزة ناس نازلين من الميكروباص وناس تانية عايزين يركبوا الميكروباص والناس عايزة تطلع وخلاص ومالهاش دعوة بالناس اللي جوا المهم عندهم بس انهم يفوزوا بكرسي في البرلمان ... قصدي الميكروباص وبجد كانت مهزلة والناس محشورة في حتة حديدة

فأنا قررت إني أقلل من الميكروباصات وأركب تاكسيات ،،، وللأسف القرار ما كانش في محله تماما

التكاسي بقت غريبة جدا السواق ما بيفرقش اللي راكب معاه راجل ولا ست
بيهب فيه وخلاص ، وانتم عارفين إن الكائنات الرقيقة اللي زينا بتتأثر على طول :D
فين أيام زمان أيام ما كانت التكاسي بعداد كان في حاجة ما يختلفش عليها اتنين
لكن دلوقتي السواق بمزاجه هو يقدر الفلوس على حسب مزاجه والأغرب إنهم بيطلبوا ارقام غريبة جدا ويا إما تدفع يا إما تتهان وتتبعتر - لا مؤاخذه يعني - كرامتك

يعني يا إما الواحد يتهان في الميكروباصات والاتوبيسات أو إنه يدبح في الفلوس ، المفروض التاكسيات دي يكون ليها ميزانية تانية لوحدها

لكن في حل أفضل بقى من ده كله وايه بقى تكون محافظ على كرامتك ، انك تعتمد على الجهود الذاتية وتاخدها موتورجل

فعلا تحيا مواصلات مصر العربية

أسماء ولكن ...

السلام عليكم ورحمة الله وبركاته

للي ميعرفش اسمي فأنا إسمي إنجي ...
ما أكدبش عليكم أنا بحب إسمي جدا لأن أهلي هما اللي سموني كده ولأن ليه دلع كتير:D
يعني كل واحده من صحباتي بتندهني بإسم مختلف عن التانية
المهم في في كليتي أسامي تانية من قبيلة إسمي زي مثلا نانسي وهايدي وما شابه
مع أحترامي الشديد لأهلي ولأهالي الناس اللي أساميهم من قبيلة إسمي ولكن للأسف الأسامي دي بقت منتشرة جدا وبقيت باحس إن احنا في دولة أوروبية
لأ يا جماعة إحنا في مصر ،،، تخيلو ،،، لازم تكون أسامينا عربية
والأسماء الجميلة بتاعة الصحابة أو الأسماء اللي ليها معاني جميلة بقت نادرة الوجود
إيه رأيكم لو عملنا حملة ضد إسمي
حملة ضد إنجي ... احم ... لأ قصدي ضد إسم إنجي
إيه رأيكم لو أي حد منتظر مولود أو سيرزق بإذن الله يختار أسماء من الأسامي الجميلة وياخد نية إحياء سنة نبينا الجميل
وحتى لو الناس اتريقت أو طلبت منكم إنكم تسموا على الموضة قولولهم لأ إحنا هنخلي من بيتنا جزء من حياة الصحابة من أول الإسم للفعل

نفسي

السلام عليكم ورحمة الله وبركاته

نفسي ...

نفسي ألاقي إن الطبيعي بين الناس هو التدين والحب والناس تتفنن في ألوان الخير

نفسي مالاقيش الحاجات اللي انا شايفاها دلوقتي من هوان المعاصي على الناس و من بعدهم عن ربنا

نفسي كل الناس تعيش على طبيعتها ماتتصنعش

نفسي أدي ربي حقه وما أقصرش أبدا

نفسي ادي انجي حقها اوي من كل حاجة وادي كمان كل حاجة حقها سواء ناس او علم او حتى حيوانات

نفسي اشوف حلمي بيتحقق واشوف كل صحابي حققوا احلامهم واشوف كل واحده فينا حاجة كبيرة اوي في الدنيا وحاجة اكبر في الاخرة وانا معاهم ان شاء الله

نفسي اتعلم اوي عن الاسلام

نفسي ونفسي و نفسي ونفسي في حاجات كتير اوي

نفسي اعامل الناس كلها كويس

نفسي اصلح علاقتي بكل اللي حواليا

نفسي اكون بجد رمز للمسلمين

نفسي اوي اعمل برامج تفيد الناس

نفسي اكون سبب في ان حياة ولاد اخواتي كلهم تتغير للاحسن

نفسي انا وصحابي تكون علاقتنا قوية أوي أكتر من الأول و نتعاون على الخير

نفسي منطقة الهرم كلها تكون مشهورة بحاجة أحسن من اللي بيجي في ذهن أي حد من أول ما نقول شارع الهرم

نفسي ولادي يكونوا ناس تتغير بسببهم امم

نفسي البرمجة تنتشر وسط الناس كلها وتكون مصر رائدة البرمجة في العالم كله

نفسي ونفسي ونفسي ونفسي

باحلم وحلمي بسيط مش كتر مال ولا سيط باحلم أكون نفسي

يا رب نعيش في حتة نضيفة ... أو على الأقل حتة تحترم آدميتنا

السلام عليكم ورحمة الله وبركاته
إمبارح كان ليا واحده صاحبتي تعبانة شوية قلت ايه أما أعمل معاها حركة جدعنة وأروح أزورها باكلمها في التليفون لقيت صوتها ضايع خالص باقولها أجيلك وأجيبلك معايا برتقال قالتلي لأ عندنا برتقال هاتي موز
:D
فأنا إيه بقى باموت في الكشري قلت خلاص أنا مش هاجيبلها موز وهاجيب علبتين كشري ونديها كشري
يا عيني البنت أول ما شمت الريحة بس كانت هتنهار مني
ما هو صحيح حد يجيب لحد عيان كشري
المهم انتم عارفين المثل اللي بيقول يا بخت من زار وخفف أهو ده بقى بالذات أنا ماكنتش باطبقه خالص يا دوب اقعدت عندها حوالي ساعتين وقلت إيه بقى أخليها خفيفة وبلاش أبقى تقيلة على حد وروحت ماشية
حلو أوي الكلام ده فين بقى المشكلة اللي هاتكلم عنها
:D
المشكلة في طريق الذهاب والعودة
بجد أنا إتأكدت إن مصر لا تحترم شعبها الطيب الصبور المهاود
بجد الشوارع وحشة أوي يعني من كام شهر كده كنت باروحلها كانوا بدأوا في مشروع في المنطقة دي وحفر وبهدلة فظيعة في الشارع واروح النهارده والاقي الحال كما هو عليه بس من غير عمال سايبين الشارع كده وكمان اللي كانوا مطلعينه من الارض متكوم على جنب بجد ما ينفعش اننا نهتم بمصر الجديدة ومدينة نصر والاماكن اللي الزوار بيجولنا فيها وننسى الأماكن الأهم اللي بيعيش فيها كمية كبيرة من
الناس
ففي واحده صاحبتي تانية باكلمها باقولها ايه اللي عاملينه في الشارع ده فبتقولي ان هي عندها نفس الموضوع عندهم في الشارع مكومين - أنا أسفة في اللي هاقوله - مخلفات الناس كلها " زباله يعني " - بس انا زي ما تقولوا محرجة اكتبها -
وكل منطقة تقول دي مش بتاعتي ومش عايزة تشيلها
ده بقى غير الشوارع نفسها مش مظبوطة الواحد حاسس انه في خلاط وهو بيمشى في الشوارع دي
أنا مش عايزة أذكر مناطق لان ده في اغلب مناطق مصر

كل اللي الإنسان عايزه في الدنيا ايه غير إنه يعيش في مكان يحترمه ويحترم آدميته

التعليم وسنينه

السلام عليكم ورحمة الله وبركاته
مشكلتنا مع التعليم- الله يسامح اللي كان السبب -
الواحد بعد ما ساب المدرسة وأسلوب التعليم السئ قال هيدخل الكلية هيتصلح حاله شوية وفعلا لما دخلنا الكلية لقينا دراسة صح أو خلينا نقول إنها كانت أصح من أيام المدرسة وللأسف كنا إتعودنا على الحفظ والصم ولكن إننا نفهم فده كان موضوع صعب علينا أوي
وكنا بالفعل بنتعذب مع المواد اللي فيها فهم ولكن المواد اللي تشبه مواد المدرسة كنت تلاقينا فيها إيه ولا أينشتين في زمانه
المهم إتعودنا إننا نفهم الحمد لله وحسينا بجد بالفرق الكبير بين الحفظ والفهم ولقينا إن المواد اللي كنا بنفهمها هي دي اللي فاهمينها لغاية دلوقتي بفضل الله
المهم بقى كانت عندنا مادة السنة اللي فاتت كنت بحبها جدا ولكن طريقة شرحها كان فيها عيوب كتير وللأسف ده أثر بشكل كبير على فهمنا ليها
والحمد لله نجحنا فيها وعدينا السنة دي
المشكلة بقى في إيه غير إننا ماكناش فاهمينها إن علينا كورس السنة دي معتمد عليها
الدكتور لما بيدخل بجد بيصعب علي
والله الدكتور شرحه تحفة وراجل كويس جدا
بس الراجل صعبان علي أوي يا عيني يجيي يسألنا إنتوا خدتوا كذا نقوله كلنا في صوت واحد لأ يقولنا طيب إنتوا فاكرين كذا مفيش أبيض خالص
المهم هو كان عندنا النهارده بيقولنا انتوا متعرفوش حاجة يلا روحوا بقى :D
هو كان بيقولها بهزار بس وقتها حسيت أد إيه الراجل ده هيتعب معانا أوي
بس هو شكله من النوع اللي مش بيستسلم بسرعة وهيحاول يجعل مننا أحمد زويل الثاني

بس يا خوفي من الدكتور ده شكله كده ما يطمنش هو دكتور لطيف جدا بيهزر كتير في المحاضرة وشرحه حلو أوي ولكن باخاف أنا من النوعيه دي شكل إمتحاناته بتيجي مش أد كده

يا خوفي منك يا بدرااااااااااااااااااااااااااااااان

معاً نحو حياة أفضل

السلام عليكم ورحمة الله وبركاته

أهلا بكل من يزور مدونتي ...
هدفي من هذه المدونة هو عرض ومناقشة الإيجابيات والسلبيات التي نراها في حياتنا
كثير منا يواجه أشخاص أو مواقف تستحق مننا أن نقدم لهم كل شكر وتقدير وأحيانا نقابل مشاكل نتمنى لو أننا لم نراها في هذه الدنيا مثل التلوث مثل الغش مثل عدم الإتقان في العمل
أرحب بأي مشاركة في مدونتي

معاً نحو حياة أفضل
جزاكم الله كل خير
السلام عليكم ورحمة الله وبركاته